Ушбу рисола Ўзбекистон мутахассислари томонидан "Номоддий маданий меросни муҳофаза қилиш тўғрисида"ги ЮНЕСКО конвенциясига мувофиқ, Маданият ва спорт ишлари вазирлиги қошидаги Республика халқ ижодиёти ва маданий-маърифий ишлар илмий-методик маркази томонидан тасдиқланган миллий рўйхат асосида тайёрланди.

Дунёнинг бошқа халқлари каби, ҳозирги кундаги Ўзбекистон ҳудудида яшаётган халқлар ўзининг бой оғзаки халқ ижодига эга. Халқ оғзаки ижоди жанрлари ичида достонлар ўзининг ҳажми ва ифода шаклларининг турфахиллиги билан алоҳида ажралиб туради.

Маразий Осиё халқлари анъанавий маданиятининг бадиий дунёси вақт билан боғлиқ бўлмаган аниқ тарихий мазмунни ўзида мужассам этади. Фаннинг замонавий ривожланиш босқичида минтақа халқларининг бадиий ижодини ўзига хослигини ўрганиш муҳим ҳисобланади, чунки бу уларнинг бадиий олами ҳақида умумий манзарани ҳосил қилишга кўмак беради.

Халқ ижодини ўрганиш бу халқнинг турмуш тарзи, урф-одати, анъаналари, тарихи, бугуни ва келажаги, тафаккур тарзи ҳамда руҳиятини ўрганиш демакдир. Унда миллатнинг ўзини билиш, англаш, намоён этиш хислатлари, уринишлари, халқнинг минг йиллик ҳаёт тарзи, дунёқараши акс этган бўлиб, оддийроқ тилда айтадиган бўлсак, халқ ижодини ўрганиш бу бевосита халқнинг ўзини ўрганиш демакдир.